РИСТОВ ПОВТОРНО ПРЕД СУД: Одбраната го оспори начинот на обработка на доказите

Продолжува судскиот процес против поранешниот апелациски судија Ѓоко Ристов, обвинет за прикривање имот и перење пари. На последното рочиште, вештаци од МВР посочиле дека нема контаминација во ДНК-трагите на Ристов, пронајдени на алуминиумските фолии во кои биле завиткани 350 илјади евра. Парите биле пронајдени соѕидани во куќа на неговите родители во Неготино. Одбраната повторно го оспорила начинот на кој фолиите биле чувани и обработувани, тврдејќи дека не биле следени соодветните процедури. На рочиштето биле изведувани и комуникации на обвинети лица од други предмети, со кои обвинителството се обидува да покаже дека Ристов имал намера да прима мито.

Вештаците од МВР без сомнеж за контаминација

Вештаците посочиле дека ДНК-трагите пронајдени на алуминиумските фолии не биле контаминирани. Одбраната, сепак, останува на ставот дека доказниот материјал не бил чуван и обработуван согласно процедурите.

Изведувани и комуникации

Во судницата биле презентирани и комуникации од други предмети, меѓу кои и снимен разговор преку ПИ-мерки меѓу Александар Велјановски од Неготино и Ристов. Велјановски во разговорот го прашува Ристов дали земал мито.