НОВИ ВОЗИЛА ЗА ТРАНСПОРТНИТЕ ИНСПЕКТОРИ: ЕУ донираше опрема вредна 700.000 евра

Државниот инспекторат за транспорт доби 19 нови возила и опрема во вкупна вредност од 700.000 евра, обезбедени како донација од Европската Унија. Донацијата ја промовираа вицепремиерот и министер за транспорт Александар Николоски и амбасадорот на Европската Унија во Македонија, Михалис Рокас.

Мобилен контролен центар и специјално опремени возила

Донацијата опфаќа 16 специјално опремени патнички возила, две возила за следење и адаптирано комбе кое ќе се користи како мобилен контролен центар. Инспекторатот доби и современ софтвер за следење на возилата, а предвидена е и обука за инспекторите.

Побрзи контроли и поголема безбедност

Според Николоски, новата опрема ќе овозможи побрз и поефикасен инспекциски надзор и ќе придонесе за поголема безбедност во сообраќајот. Возилата ќе се користат при контрола на прекумерната тежина на товарните возила, превозот на опасни материи и техничката исправност на автобусите во јавниот превоз. Министерот најави дека во втората фаза се планираат и дополнителни инвестиции за подобрување на капацитетите на Државниот инспекторат за транспорт.