17 ГОДИНИ ОД ТРАГЕДИЈАТА СО „ИЛИНДЕН“: Охрид се сеќава на 15-те жртви

Во Охрид денеска беа одбележани 17 години од трагичната несреќа со бродот „Илинден“, во која животот го загубија 15 бугарски туристи. На спомен-обележјето „Солза на Роза“ беше положено цвеќе во знак на почит и сеќавање на жртвите. На комеморацијата присуствуваа делегации од Општина Охрид, Амбасадата на Бугарија, Генералниот конзулат во Битола, локални институции, здруженија и граѓани. Генералниот конзул на Бугарија изрази благодарност до сите кои учествувале во спасувањето на патниците по несреќата.

Кобното утро на Охридското Езеро

Трагедијата се случи на 5 септември 2009 година, кога „Илинден“ со 57 патници потона на околу 250 метри од брегот, кај автокампот „Елешец“. Осум од загинатите биле жители на општина Антон, четворица од Пирдоп, а по еден од Златица, Мирково и Рибарица.

„Илинден“ и денес е нем сведок

Бродот беше извлечен од езерото две недели по несреќата и одвлечен до каналот Студенчишта, каде што се наоѓа и денес. Пред шест години во негова близина беше откриен споменикот „Солза на Роза“, кој потсетува на една од најтешките трагедии на Охридското Езеро.