ДО 30.000 ДЕНАРИ ПОМОШ ЗА ГРЕЕЊЕ НА ГАС: Продолжен рокот за аплицирање до 31 октомври

Граѓаните кои планираат да преминат на природен гас за греење ќе имаат дополнително време да аплицираат за финансиска поддршка од државата.

Министерството за енергетика, рударство и минерални суровини информира дека рокот за аплицирање за мерката за поттикнување на снабдувањето со гас во домаќинствата е продолжен до 31 октомври 2026 година.

Со оваа мерка се овозможува субвенционирање за приклучок на природен гас или за набавка на котел на гас. За мерката се обезбедени 3 милиони денари, а финансиската поддршка изнесува до 30.000 денари, односно до 70 проценти од направените трошоци.

Средствата ќе се доделуваат по принципот „прв дојден – прв услужен“, до нивно целосно искористување.

Право на апликација имаат домаќинствата кои во текот на 2026 година ќе извршат приклучок на системот за дистрибуција на природен гас, како и оние кои ќе набават котел на гас за објект кој веќе бил приклучен на системот до 1 јануари 2026 година.

Секое домаќинство може да поднесе едно барање, а по истекот на рокот комисија од Министерството ќе ги разгледува апликациите. Средствата ќе им бидат исплатени на барателите кои ги исполнуваат условите.

Целта на мерката е намалување на трошоците за греење, подобрување на енергетската ефикасност и поттикнување користење почисти енергетски решенија во домаќинствата.