ИСТОРИСКА ПОСЕТА: Претседателката на Индија пристигна во Македонија

Претседателката на Индија, Друпади Мурму, пристигна во официјална посета на Македонија, што претставува прва посета на индиски претседател на земјава. Посетата се реализира на покана на македонската претседателка Гордана Сиљановска-Давкова и е дел од европската турнеја на Мурму, која ги опфаќа и Молдавија и Романија.

Средби со македонскиот државен врв

Во рамки на посетата, Мурму ќе биде пречекана со највисоки државни и воени почести во Кабинетот на претседателката. Предвидени се тет-а-тет разговори и средба на делегациите предводени од претседателките на двете држави.

Индиската претседателка треба да се сретне и со премиерот Христијан Мицкоски, како и со претседателот на Собранието. Таа ќе се обрати пред пратениците во македонското Собрание, што претставува еден од централните настани од официјалната програма.

Македонско-индиски бизнис-форум

Во Скопје ќе се одржи и Македонско-индиски бизнис-форум, на кој се очекува да бидат разгледани можностите за поголема економска соработка, трговија и инвестиции. Како области со потенцијал за соработка се посочуваат земјоделството, фармацевтската индустрија, науката, технологијата и информатичките услуги.

Посетата треба да даде нов импулс на билатералните односи и да го зајакне политичкиот, економскиот и институционалниот дијалог меѓу Македонија и Индија. Мурму престојува во Македонија на 21 и 22 јули, по што ќе ја продолжи турнејата во Романија.