ЈАНЕВСКА: Стануваат видливи резултатите од научните проекти што ги поддржавме со буџет од 6 милиони евра

Владата минатата година издвои шест милиони евра за финансирање на имплементацијата на 50 научноистражувачки проекти од јавен интерес, а според министерката за образование и наука, Весна Јаневска, веќе стануваат видливи резултатите од оваа поддршка. Таа го истакна ова на отворањето на меѓународната научна конференција на ЈНУ Институт за интелектуална сопственост – „Интелектуалната сопственост и дигиталната трансформација во македонското општество“. Проектот е организиран во рамки на проектот „Фактори на управувањето со интелектуалната сопственост и дигиталната трансформација во Македонија“, финансиран од Министерството за образование и наука.

Фокус на дигиталната трансформација и интелектуалната сопственост

Јаневска посочи дека проектот го истражува влијанието на дигиталната трансформација врз правната рамка за заштита на интелектуалната сопственост. Меѓу темите се технолошкиот развој, забрзаната дигитализација, новите можности и предизвиците поврзани со правата, регулаторните рамки и заштитата на авторските дела, трговските марки, патентите и личните податоци. Според министерката, овие процеси отвораат нови прашања за кои е потребно усогласување со современите европски и светски тенденции.

Науката како двигател на развојот

Министерката нагласи дека науката има важна улога во развојот на општеството и дека поддршката за истражувачката работа треба да создаде реална вредност за институциите, економијата и граѓаните. Таа додаде дека целта е да се овозможи поширок пристап до најновите глобални научни бази, како Web of Science и Scopus, за македонските научници и академски професори. Јаневска посочи и дека Министерството ги покрива трошоците за објавување научни трудови во списанија со импакт-фактор, како и учеството на меѓународни научни конференции и објавувањето трудови во зборници.