(ВИДЕО) ЃОКОВИЌ ЗА НОЌТА КОГА БЕГАЛ ОД БОМБИТЕ: „Паднав, викав помош, но никој не ме слушна“

Новак Ѓоковиќ  го опиша стравот од бомбардирањето

Новак Ѓоковиќ откри детали од едно од најтешките искуства од своето детство, кога како 12-годишно момче го преживеал НАТО бомбардирањето на Белград во 1999 година. Во новиот документарен филм „The Wolf in Winter“, тенискиот ас раскажува како неговото семејство во текот на ноќта морало да го напушти станот и да трча кон друга зграда поради експлозиите. Во една од најдраматичните ноќи, Ѓоковиќ се сопнал и паднал додека неговото семејство било 12 до 15 метри пред него. Тој викал по помош, но никој не го слушнал, а потоа, како што раскажува, видел авион како фрла две бомби врз блиската болница. „Стоев на дождот сам и во темница“, се присетува Ѓоковиќ на трауматичниот момент.

Родителите се задолжувале за неговата тениска кариера

И покрај воените услови и тешката економска ситуација, Ѓоковиќ не се откажал од тенисот и продолжил да тренира. Неговото семејство се соочувало со сериозни финансиски проблеми, а родителите морале да позајмуваат пари за да му овозможат да ја гради кариерата. Ѓоковиќ откри дека во одреден период пари позајмувале и од луѓе од криминалното милје, додека неговиот татко подоцна му кажал дека во еден момент семејството имало само десет германски марки. Овие околности, според Новак, го натерале многу рано да созрее и да стане посериозен од своите врсници. Во есента 1999 година тој заминал во Минхен, каде што продолжил со тенискиот развој во академијата на Никола Пилиќ.