ПРЕОБРАЖЕНИЕ ГОСПОДОВО: жените прават посебен обичај за здравје и благосостојба во домот

На Преображение Господово првпат се јаде благословено грозје

Денеска православните верници го празнуваат Преображение Господово, еден од големите христијански празници посветени на Преображението на Исус Христос на Таворската гора. Според народните обичаи, на овој ден за првпат се јаде грозје, откако претходно ќе биде благословено во црква. Во некои краеви постои и посебен обичај домаќинките да подготвуваат наутлија, обреден леб направен со квас од наут. Се верува дека овој леб се подготвува за здравје, среќа и благосостојба на семејството.

Празник посветен на Христовото Преображение

Според Евангелието, Исус Христос на Таворската гора се преобразил пред своите ученици Петар, Јаков и Јован, при што неговото лице заблескало, а облеката му побелела како снег. Покрај него се појавиле Мојсеј и Илија, а од небото се слушнал глас кој го потврдил неговото божествено потекло. Празникот во православната традиција има силно духовно значење и потсетува на Христовата божествена слава. На Преображение е дозволена риба, иако празникот паѓа во период на пост.