ОД 26 АВГУСТ ПОЧНУВА ПРИЈАВУВАЊЕТО ЗА СТУДЕНТСКИ ОБРОК: Студентите ќе добиваат по 140 денари дневно

Од 26 до 31 август ќе трае пријавувањето за остварување на правото на субвенциониран студентски оброк за академската 2026/2027 година. На повикот треба да се пријават сите студенти, и бруцоши и студенти од повисоките години, доколку сакаат да го користат правото од 1 октомври.

Кој може да аплицира за студентски оброк?

Аплицирањето се врши електронски преку порталот e-uslugi.mon.gov.mk, а право имаат редовните студенти на прв и втор циклус, како и студентите на интегрирани студии на јавните и приватните универзитети во земјава. Услов е кандидатите да бидат државјани на Македонија и да немаат месечен приход по кој било основ поголем од минималната нето-плата во тековната година.

Поддршката изнесува 140 денари

Финансиската поддршка изнесува 140 денари дневно и е наменета за купување храна, од понеделник до сабота, кај правни лица кои произведуваат, подготвуваат или продаваат храна. Надоместокот не се исплаќа во периодот од 1 јули до 1 октомври, односно за време на летниот распуст.