СКОПЈАНИ РЕАГИРААТ НА СТАОРЦИ И ГЛУВЦИ ВО БУЊАКОВЕЦ: Забележани и живи и мртви на паркингот кај „Песталоци“

Граѓани пријавуваат појава на стаорци

Граѓани реагираат на појавата на стаорци и глувци во Буњаковец, откако на социјалните мрежи беа објавени фотографии од паркингот во близина на Основното училиште „Ј.Х. Песталоци“. Според објавата на Фејсбук страницата „Во одбрана на Буњаковец“, до нив пристигнувале реакции од граѓани кои пријавиле присуство на глодари во овој дел од населбата. Станува збор за локацијата помеѓу Трговскиот центар „Буњаковец“ и основното училиште „Ј.Х. Песталоци“. Според објавеното, биле забележани и живи и мртви стаорци на паркингот.

Фотографиите се направени вчера

Од страницата „Во одбрана на Буњаковец“ посочиле дека фотографиите кои ги споделиле биле направени во текот на вчерашниот ден. Објавата предизвика реакции кај жителите, особено поради близината на локацијата до основното училиште и фреквентниот простор околу Буњаковец. Засега нема информации од надлежните институции дали е извршен увид на терен и дали се преземаат активности за дератизација на просторот. Граѓаните очекуваат надлежните служби да ја проверат состојбата и да преземат мерки доколку се утврди зголемено присуство на глодари.