БИТКОИНОТ И ЕТЕРОТ СИЛНО ПОРАСНАА: Трамп бара Конгресот да го усвои законот за криптовалутите

Криптопазарот реагираше позитивно

Биткоинот, етерот и другите криптовалути забележаа силен раст откако американскиот претседател Доналд Трамп го повика Конгресот да го усвои „Clarity Act“, закон кој треба да создаде поповолна регулаторна рамка за криптоиндустријата. Позитивното расположение дополнително го поттикнаа неговите изјави во поддршка на криптосекторот, како и најавите поврзани со купување значителни количини биткоин. По изјавите на Трамп, токенот Hyperliquid за 24 часа пораснал за околу 20 отсто, според податоците на CoinGecko. На растот влијаел и падот на приносите на американските државни обврзници, што ја зголемило привлечноста на поризичните средства. Тргувањето со американскиот биткоин ЕТФ-фонд iShares Bitcoin Trust исто така нагло се зголемило.

Етерот достигна тримесечен максимум

Според аналитичарот Џефри Кендрик од Standard Chartered, инвеститорите сега треба да се подготвуваат за можност биткоинот да достигне 100.000 долари до крајот на 2026 година. Силниот раст предизвикал и масовно затворање на кратките позиции, при што аналитичарите го опишуваат движењето како едно од најголемите ликвидирања на „short“ позиции. Етерот во изминатите седум дена поскапел за околу 19 отсто и достигнал 2.251 долар, што е негово највисоко ниво во последните три месеци. Биткоинот претходно околу шест недели се движел во релативно тесен опсег меѓу 62.000 и 66.000 долари, пред најновиот бран на раст.