ДЕНЕСКА СЕ ПРАЗНУВА СВЕТИОТ ВЕЛИКОМАЧЕНИК АРТЕМИЈ: Страдал за православната вера и го разобличил царот Јулијан

Православните верници денеска го одбележуваат споменот на Светиот великомаченик Артемиј, кој живеел во времето на царевите Константин Велики, Констанциј и Јулијан Отстапник. Родум бил од Египет и служел како војвода, а по прифаќањето на христијанството добил високи должности во царската служба. Во времето на Јулијан Отстапник отворено застанал во одбрана на двајца христијански свештеници кои биле изложени на мачење поради својата вера.

Се спротивставил на царот Јулијан

Кога видел како царот ги мачи свештениците Евгениј и Макариј, Артемиј го осудил неговото постапување и го предупредил дека го очекува пропаст. Поради своето спротивставување, бил лишен од војводската должност, мачен и фрлен во затвор. Според житието, во затворот му се јавил Исус Христос, кој го исцелил и го утешил.

Артемиј пострадал во 362 година

Мачењата продолжиле по наредба на царот, а Артемиј бил изложен на тешки измачувања, по што му била отсечена главата во 362 година. Неговата смрт во православното предание се смета за сведоштво за непоколебливата вера и храброста да се застане во одбрана на христијанството. Подоцна, како што се наведува во житието, царот Јулијан загинал во походот против Персијците, исполнувајќи го претскажувањето на свети Артемиј.