ЕЛЕКТРИЧНИТЕ АВТОМОБИЛИ СО РЕКОРДНА ПРОДАЖБА ВО ЕВРОПА: за осум месеци продадени 1,64 милиони

Продажбата на целосно електрични автомобили во Европската Унија достигна рекордно ниво годинава, со 1,64 милиони продадени возила од јануари до август. Тоа претставува раст од 45 проценти во споредба со истиот период минатата година. Електричните автомобили сега учествуваат со 22 проценти во вкупната продажба на нови автомобили во ЕУ, што е за шест процентни поени повеќе од лани.

Поголем избор автомобили и поевтини модели

Растот е поттикнат од зголемениот избор на модели и појавата на подостапни електрични автомобили. Бројот на достапни електрични модели за само една година е зголемен за 50 проценти, додека производителите ја прошируваат понудата за да ги исполнат европските правила за емисиите. Европските компании имаат речиси 60 проценти од достапните модели, а кинеските производители учествуваат со 21 процент.

Поскапото гориво дополнително ја зголемува побарувачката

Дополнителен мотив за купувачите се и повисоките цени на горивата. Според извештајот, дизелот е поскапен за 38 проценти од почетокот на војната со Иран, поради што полнењето резервоар од 50 литри во Европа сега чини околу 30 евра повеќе. Трендот покажува дека електричните автомобили продолжуваат да заземаат сè поголем дел од европскиот автомобилски пазар.

Фактор портал