(ВИДЕО) АСТОН МАРТИН СО ШПИОНСКА ИСТОРИЈА ОДИ НА АУКЦИЈА ЗА 400.000 ФУНТИ?!

Редок примерок на „Aston Martin DB5“ од 1964 година, чиј прв сопственик бил британски разузнавач вклучен во дешифрирањето на германскиот енкрипциски систем „Енигма“ за време на Втората светска војна, ќе биде понуден на аукција. Автомобилот е проценет на 350.000 до 400.000 фунти, а продажбата е закажана за 10 декември во Сендаун Парк, во англиската грофовија Сари. Првиот сопственик, П. Х. Манерс Вуд, работел во разузнавачката служба „Air Ultra Intelligence“ во Блечли Парк, каде што ги толкувал дешифрираните пораки на германската војска. Овие информации им овозможувале на сојузничките сили да добијат важни податоци за германските воени комуникации. По Вуд, автомобилот имал уште двајца сопственици, а сегашниот го поседува веќе 56 години.

Зачуван во речиси оригинална состојба

Автомобилот досега поминал 94.000 милји, а ги има оригиналниот ентериер и моторот со идентификациски броеви што се совпаѓаат со фабричките податоци. Зачувани се и оригиналната зелена сообраќајна книшка, фабричкиот производствен лист и сертификатот за потекло. Од аукциската куќа „H&H Classics“ велат дека станува збор за исклучителен примерок кој се издвојува по својата оригиналност и историја.

На аукција и најмалиот сериски автомобил во светот

На друга аукција во Англија ќе биде понуден и „Peel P50“, кој важи за најмалиот сериски автомобил во светот. Неговата проценета вредност е од 40.000 до 60.000 фунти, а продажбата е закажана за 14 ноември. Возилото има три тркала, долго е само 1,37 метри и широко околу 1,07 метри, со простор за еден возрасен човек и кеса со намирници. Маслинестозелениот примерок бил увезен како нов во Финска во 1964 година, а денес во светот се зачувани помалку од 30 вакви автомобили, што ги прави особено барани меѓу колекционерите.