ЕУ вложува 200 милиони евра во Гренланд: Фон дер Лајен испрати јасна порака до САД

Брисел го засилува присуството на Арктикот

Европската унија ќе вложи 200 милиони евра во Гренланд, најави претседателката на Европската комисија, Урсула фон дер Лајен, по дводневната посета на главниот град Нук. Средствата се наменети за конкретни развојни програми на островот, а Брисел најавува и поголема ангажираност во Арктичкиот регион. Фон дер Лајен порача дека ЕУ сака да биде „поприсутна и поангажирана“ во Гренланд и на Арктикот.

„За иднината одлучуваат жителите и Данска“

Посетата доаѓа во период на зголемени геополитички тензии околу Гренланд, откако американскиот претседател Доналд Трамп повеќепати ја истакна стратешката важност на островот и интересот на САД за негово преземање. Фон дер Лајен јасно порача дека иднината на Гренланд треба да ја определат неговите жители и Данска, нагласувајќи: „Никој друг“. Гренландскиот премиер Јенс-Фредерик Нилсен и данската премиерка Мете Фредериксен го поддржаа ставот дека соработката со ЕУ е од значење и за Гренланд и за Европа.