Свет
Дознај прв
НЕПАЛ: Над 670 загинати, илјадници исчезнати, за обновата потребни до 5 милијарди долари
Разорни поплави во Непал однесоа над 670 животи, а повеќе од 3.000 лица се водат како исчезнати. Обновата ќе чини до 5 милијарди долари.
Властите во Непал побараа меѓународна техничка и финансиска помош по разорните поплави што го погодија хималајскиот регион долж границата со Тибет. Според последните податоци, над 670 лица загинале, а повеќе од 3.000 се водат како исчезнати. Спасувачките операции продолжуваат, но се отежнати поради лошото време и опасноста од ново излевање на езеро во погодениот пограничен регион.
Потребна специјализирана опрема во Непал
Непалските власти велат дека имаат доволно спасувачки екипи за основните операции, но им недостигаат специјализирана опрема и експертиза. Потребна е помош за спасување на луѓе заробени во тунели, транспорт до отсечените области, изградба на привремени мостови и идентификација на жртвите преку ДНК-анализа. Кина веќе испрати експерти за тунелски спасувачки операции, додека Индија обезбеди инженерски тимови, медицинска помош и опрема.
Штетите се бројат во милијарди
Разорната поплава, предизвикана од уривање на глечер или голема ледена маса во Хималаите, носела вода, карпи, мраз и кал низ речните долини, уништувајќи населби, патишта и мостови. Министерот за финансии проценува дека обновата ќе чини меѓу четири и пет милијарди долари, што е приближно една десеттина од целата непалска економија. Особено тешко е погоден хидроенергетскиот сектор, а илјадници преживеани останале без домови и во дел од областите може да се стигне само со хеликоптер.
View this post on Instagram
