НОВИ ОЛЕСНУВАЊА ЗА КЛИЕНТИТЕ НА „АЛТА БАНКА“: Отвораат шалтери во Тетово и Струмица, се зголемуваат лимитите

Народната банка најави три нови олеснувања за клиентите на „АЛТА банка“ АД Битола, со цел да им се овозможи полесен пристап до нивните средства. Гувернерот Трајко Славески соопшти дека мерките опфаќаат проширување на мрежата за исплата на готовина, зголемување на лимитите за платежните картички и целосно располагање со идните приливи од плати, пензии и социјална помош. Шалтери во Тетово и Струмица ќе бидат отворени од 9 ноември, а граѓаните без платежни картички ќе можат да подигнат до 20.000 денари.

Се отвораат шалтери во два града, се организира и превоз

За граѓаните од Прилеп, Ресен и Охрид ќе биде организиран автобуски превоз до филијалата на „АЛТА банка“ во Битола, за да можат да ги подигнат пензиите и социјалната помош. Од следната недела, неделниот лимит за подигање готовина и плаќања со платежни картички се зголемува од 10.000 на 15.000 денари. Дополнително, сите идни приливи од плати, пензии и социјални трансфери од институции и компании кои имаат сметки во други банки ќе може да се повлекуваат во целост, без ограничување на износот.

Народната банка: „АЛТА банка“ работи и е ликвидна

Според Народната банка, исплатите досега се одвиваат според утврдениот распоред, а само денеска во филијалата во Битола биле услужени околу 660 клиенти. Просечниот повлечен износ по клиент изнесувал околу 19.000 денари претходниот ден, а денеска околу 16.000 денари. Од Народната банка нагласуваат дека „АЛТА банка“ продолжува да работи, не е во стечај и не ѝ е одземена дозволата за работа. Администрацијата е привремена мерка до промена на сопственоста, а според соопштението, банката е ликвидна и висококапитализирана. Средствата на клиентите остануваат на нивните сметки, додека ограничувањата се однесуваат само на начинот на располагање со нив.