ОБЕЗБЕДЕНИ СЕНЗОРИ ЗА СЛЕДЕЊЕ НА ШЕЌЕРОТ ВО КРВТА ЗА 800 ЛИЦА: Поддршка за пациентите со дијабетес тип 1

Министерството за здравство обезбеди сензори за континуирано следење на гликемијата за 800 лица со дијабетес тип 1, информираат од Министерството. Сензорите се обезбедени преку последната јавна набавка, согласно Програмата за дијабетес и заклучоците на Националната комисија за дијабетес. Договорот за јавната набавка е склучен во април годинава и важи до април 2028 година. Во мај и јуни биле заменети сите трансмитери согласно протоколот, а на пациентите им биле распределени сензори за шестмесечен период, односно до декември 2026 година. Од Министерството посочуваат дека со ова се овозможува континуирано следење на нивото на шеќер во крвта и подобро контролирање на болеста.

Кои пациенти се опфатени со сензорите?

Со сензори се опфатени лицата со дијабетес тип 1 до 25-годишна возраст, бремените жени со дијабетес тип 1, слепите лица со оваа дијагноза, како и пациентите со најтешки компликации и придружни заболувања. Сензорите се подигнуваат во инсулинските аптеки, согласно утврдениот режим.

Бројот на пациенти со дијабетес тип 1 е зголемен од 650 на 800

Од Министерството потсетуваат дека сензорите за континуирано следење на гликемијата првпат биле обезбедени во 2023 година за 650 пациенти. Со јавната набавка во 2026 година, бројот на опфатени лица е зголемен на 800. Од институцијата велат дека ќе продолжат со напорите за подобрување на грижата за лицата со дијабетес и соработката со пациентските организации.