СДСМ БАРА ИСТРАГА ЗА 5,5 МИЛИОНИ ЕВРА: Партијата вели дека предметот на ДКСК не ги опфаќа сите прашања

Од СДСМ  бараат Обвинителството да го следи текот на парите

СДСМ реагира дека предметот што го отвори Државната комисија за спречување на корупцијата за прославата на 35 години независност не ги опфаќа сите прашања поврзани со трошењето на околу 5,5 милиони евра. Од партијата бараат Јавното обвинителство да ги испита договорите, анексите, фактурите и податоците за исплатите поврзани со организацијата на прославата. СДСМ бара да се утврди и дали биле платени сите даночни обврски, како и кој орган донел одлука за издвојување на повеќе од 300 милиони денари од Државната лотарија. Дополнително, од партијата бараат да се утврди колку чинел настапот на Дејвид Гета, кога бил договорен и исплатен, како и колку средства добиле компаниите ангажирани за организацијата. Во реакцијата се поставува и прашањето каде завршиле околу 1,75 милиони денари од продадените билети. СДСМ смета дека отворањето предмет за можен судир на интереси кај едно лице претставува само еден сегмент од целата тема. ДКСК, пак, претходно соопшти дека ќе ја утврдува фактичката состојба околу финансирањето и организацијата на прославата.

ДКСК отвори предмет по сопствена иницијатива

Државната комисија за спречување на корупцијата отвори предмет по допрен глас за начинот на кој била финансирана прославата. Според претходните информации, вкупниот трошок бил околу 340 милиони денари, од кои 300 милиони денари биле обезбедени од нераспределената добивка на Државната лотарија, а околу 40 милиони денари од приватни компании.