ШТИПСКАТА БОЛНИЦА НЕ ПРИМА ПАЦИЕНТИ СО СКРШЕНИЦИ: Невремето го оштети Одделот за ортопедија

Клиничката болница во Штип привремено нема да прима пациенти со скршеници поради штетата што силното невреме ја предизвикало на Одделот за ортопедија. Од болницата ги известиле здравствените установи во Источниот регион во следните денови да не упатуваат вакви пациенти во Штип. Причината е оштетувањето на ортопедскиот оддел и операционата сала, откако силниот ветер урнал дел од покривната конструкција на болницата.

Пациентите ќе се препраќаат во други центри

Од Клиничката болница посочуваат дека пациентите со скршеници во моментов не можат да добијат соодветен третман во штипската ортопедија. До целосното санирање на штетата, тие ќе бидат препраќани во други медицински центри. Според информациите, ветерот за време на невремето достигнал брзина од 134 километри на час и предизвикал сериозно оштетување на покривот.

Хоспитализираните се преместени на други одделенија

Заменик-директорката на болницата, Билјана Ефтимова, информирала дека меѓу 15 и 20 пациенти од ортопедија се сместени на други болнички одделенија. На терен излегле и проценители кои треба да утврдат колкава е материјалната штета. Целта е санацијата на кровната конструкција и ортопедскиот оддел да започне што е можно побрзо. Од болницата засега не соопштија колку време ќе трае прекинот во приемот на пациенти со скршеници.