ВЕШТАЧКА ИНТЕЛИГЕНЦИЈА ОТКРИ 73 НЕПОЗНАТИ ВУЛКАНИ: Скриени биле на дното на океанот

Научници со помош на вештачка интелигенција откриле 73 досега непознати подморски вулкански калдери, скриени на дното на океанот.

Откритието повеќе од тројно го зголемува бројот на познати подморски калдери и може да биде важно за идни проценки на вулкански опасности. Истражувањето го предводел тимот на вулканологот Андреа Веролино од Универзитетот Paris-Saclay во Франција.

Калдерите се големи вдлабнатини слични на кратери, кои се создаваат кога дел од вулканот се урива во испразнета магматска комора. Некои од нив можеби одамна не се активни, но други можат да укажуваат на вулкански системи што повторно би можеле да еруптираат.

Научниците користеле алгоритам кој првично бил развиен за откривање кратери на Марс. Потоа го приспособиле за анализа на батиметриски карти, односно карти што ја прикажуваат топографијата на морското дно.

Ова е значајно бидејќи најголем дел од вулканската активност на Земјата се случува под морето, каде што тектонските плочи постојано се движат. Подморските калдери можат да бидат поврзани со силни ерупции, цунами и други природни опасности.

Како предупредување се посочува ерупцијата на подморскиот вулкан Hunga Tonga-Hunga Haʻapai во 2022 година, која предизвика цунами и штети на големи растојанија.

Откритието покажува дека вештачката интелигенција сè повеќе станува важна алатка во науката, не само за анализа на податоци, туку и за откривање природни феномени кои досега биле скриени од човечкото око.