Весна Јаневска: Наставниците да не се грижат за платите, ново зголемување следува во март 2027

„Платите ќе се покачуваат секоја година“ – Весна Јаневска

Министерката за образование и наука Весна Јаневска порача дека наставниците не треба да се грижат за своите плати, бидејќи ново зголемување е предвидено за март 2027 година. Таа истакна дека зголемувањето е сигурно и е во согласност со договореното со СОНК. „Не треба да мислат на платите, платите ќе се покачуваат секоја година“, рече Јаневска. Според неа, претходно имало повеќе спогодби, договори и неизвесности околу платите, но сега наставниците имаат сигурност.

Намалување на бројот на ученици и реорганизација на училиштата

Јаневска зборуваше и за актуелните промени во образовниот систем, посочувајќи дека бројот на првачиња годинава е намален за околу 3.000 во однос на лани. Поради тоа, од 1 септември привремено се затвораат 26 подрачни училишта, а во земјава има вкупно 148 празни училишни објекти, главно во руралните средини. Во учебната 2026/2027 година ќе има 433 паралелки помалку, како резултат на спојување и реорганизација на наставата. Министерката вели дека реформите се неопходни и дека нивните вистински резултати во образованието ќе се почувствуваат по пет до шест години, а оптимално по девет до десет години.