ВЛАДАТА ОБЕЗБЕДУВА БЕСПЛАТНА ВОДА ЗА ГОСТИВАР: По 50.000 литри дневно ќе се делат на седум пунктови

Владата интервентно ќе обезбедува по 50.000 литри бесплатна вода за пиење дневно за жителите на Гостивар. Мерката започнува од денеска и ќе трае во наредните неколку дена, поради проблемите со водоснабдувањето и препораките на надлежните институции.

Водата ќе се дели на седум локации

Дистрибуцијата ќе се врши преку Службата за општи и заеднички работи на Владата на седум пунктови. Вода ќе биде достапна кај „Водостопанство – Гостивар“, градинката „Пролет“, Средното економско училиште, подружницата „Шар“ на Национални шуми, гаражите на ЕСМ, Општата болница „Ферид Мурад“ и Територијалната противпожарна единица.

Продолжуваат контролите и анализите

Од Владата информираат дека се во постојана координација со надлежните институции, кои продолжуваат со контроли, анализи и истражни дејствија за утврдување на причините за состојбата. Најавено е дека секој за кого ќе биде утврдена одговорност ќе одговара согласно закон. Граѓаните се повикуваат да ги почитуваат официјалните препораки сè додека состојбата со водоснабдувањето целосно не се нормализира.