ВОЗИЛО НА АДВОКАТОТ АЛИСПАХИЌ ЗАПАЛЕНО ВО БУТЕЛ: МВР ТРАГА ПО СТОРИТЕЛОТ

Опожарени две возила по полноќ

Возило во сопственост на скопскиот адвокат Асмир Алиспахиќ било запалено во Бутел, а во истиот настан било опожарено и уште едно возило. Од МВР потврдиле дека случајот бил пријавен на 25 јуни, околу 02:20 часот, кога на подрачјето на Бутел биле опожарени „пасат“ со скопски регистарски ознаки и „мерцедес“ со велешки регистарски ознаки. Увид извршила екипа на СВР Скопје, а полицијата работи на расчистување на случајот.

Алиспахиќ: Не се сомневам во никого

Адвокатот Алиспахиќ потврдил дека информацијата е точна, но поради истрагата не сакал да изнесува дополнителни детали. Тој изјавил дека верува во институциите и нивното професионално постапување. Според неговата изјава, немал недоразбирања со никого и не се сомнева во конкретно лице. Мотивот и причината за опожарувањето, како што посочил, засега му се непознати. Алиспахиќ е адвокат со долгогодишно искуство и застапувал обвинети во повеќе случаи од јавен интерес.