3.300 НОВИ КОНТЕЈНЕРИ ЗА СКОПЈЕ: започна најголемата набавка во историјата на градот, 60 од нив ќе бидат за стакло

Првата испорака од вкупно 3.300 нови контејнери пристигна во Скопје, а нивното распоредување низ градот започнува веднаш. Според најавата на градските власти, со новата опрема ќе се заменуваат скршените и дотраени контејнери, а ќе се зголеми и бројот на местата за одлагање отпад. Целта е да се подобрат хигиената и условите во скопските населби, како и да се овозможи поефикасно собирање на сметот.

Контејнери набавени по двојно пониска цена

Според градоначалникот, контејнерите за кои претходно се плаќале по 18.600 денари сега се набавени по двојно пониска цена. Дополнително, следната недела се очекува во функција да бидат пуштени и нови камиони за собирање отпад. Обезбедени се и 60 контејнери за селекција на стакло, со цел да се зголеми рециклирањето и да се намали количеството мешан отпад.

Апел до граѓаните да не фрлаат кабаст отпад покрај контејнерите

Градските власти упатија апел до граѓаните правилно да ги користат новите контејнери и да не оставаат градежен шут и кабаст отпад во нив или покрај нив. Ваквото однесување ја оштетува опремата, го отежнува собирањето на сметот и создава диви депонии во населбите. Од Градот порачуваат дека ќе имаат нулта толеранција за ваквата неодговорност и повикуваат на заедничка грижа за почисто Скопје.