34 ГОДИНИ, ОГРОМНА ПРОМЕНА: Од 122 до 338 автомобили на 1.000 жители

Драстично се промени сликата на македонските патишта

Македонските патишта денес изгледаат сосема поинаку од пред три-четири децении, а тоа најдобро го покажува бројот на автомобили по жител. Во 1991 година имало околу 122 автомобили на 1.000 жители, додека во 2025 година бројката достигнала 338 автомобили на 1.000 жители. Во времето на поранешна Југославија, улиците ги преплавуваа Zastava 101, попознат како „101“, Yugo, „Фиќо“, Renault 4 и Volkswagen Golf. Zastava беше еден од главните производители на југословенскиот пазар, додека Golf стекна огромна популарност и поради производството во поранешна Југославија.

Golf остана легенда, но изборот на автомобили денес е многу поголем

По осамостојувањето постепено се менуваше возниот парк, а Volkswagen и Opel долго време беа меѓу најзастапените марки, додека Golf остана еден од омилените модели и беше најпродаван во Македонија во повеќе години од периодот 2011–2014. Денес понудата е многу поширока, па меѓу успешните модели се појавуваат Kia Sportage, Škoda Octavia, Toyota Corolla, Citroën C3 и Dacia Duster. Сепак, и покрај зголемениот број автомобили, македонскиот возен парк останува стар – во 2025 година имало повеќе од 615 илјади патнички автомобили, со просечна старост од околу 19 години. Дизел-возилата и понатаму доминираат со 63,8 отсто, бензинците учествуваат со 25,7 отсто, додека електричните автомобили се само 0,33 отсто, а хибридите околу 1,2 отсто. Дополнително, во 2025 година на секој нов автомобил биле увезени околу 3,5 половни возила, што покажува дека голем дел од возниот парк се обновува преку увоз на користени автомобили. Така, за нешто повеќе од три децении Македонија премина од 122 на 338 автомобили на 1.000 жители – со многу поголем избор на марки и технологии, но и со стар возен парк кој сè уште бавно се обновува.