МУЦУНСКИ ЗА СЛУЧАЈОТ „ИВА МИХАЈЛОВА“: Непристојно е земја членка на ЕУ да станува прибежиште за осудени лица

Министерот за надворешни работи и надворешна трговија, Тимчо Муцунски, оцени дека е непристојно земја членка на Европската Унија да станува прибежиште за лица осудени за кривични дела или за кои се водат судски постапки. Тој ова го изјави одговарајќи на новинарско прашање за случајот „Ива Михајлова“, на заедничката прес-конференција со словачкиот министер Јурај Бланар во Скопје. Муцунски нагласи дека Македонија нема намера да стане дел од политичката кампања во Бугарија, каде што се одвиваат претседателски избори.

Муцунски бара почитување на владеењето на правото

Шефот на македонската дипломатија посочи дека и во разговорите со словачкиот колега било истакнато очекувањето земјите членки на ЕУ да ги почитуваат највисоките стандарди за владеење на правото. Тој потврди дека дијалогот со Бугарија за евроинтеграциите продолжува, како и комуникацијата со европските институции и земјите членки, бидејќи за одлуките поврзани со пристапувањето е потребен консензус. Муцунски нагласи дека Македонија ќе продолжи да работи на изнаоѓање одржливо решение, истакнувајќи дека европскиот пат нема алтернатива.

Средба со бугарската колешка се очекува во декември

Муцунски рече дека во моментов нема планирана средба со бугарската министерка за надворешни работи, Велислава Петрова, но очекува можност за разговор во декември, во рамки на меѓународни средби. Меѓу нив се состанокот на министрите за надворешни работи на НАТО и планираниот формат за соработка на земјите од Југоисточна Европа со Украина. Тој најави дека разговорите би можеле да ги опфатат и европската интеграција и прашањата во однесувањето на соседна Бугарија што, како што рече, ја загрижуваат Македонија.