МИЦКОСКИ ОЧЕКУВА ПОБЕДА ВО БРВЕНИЦА: Целта ни е да освоиме над 4.000 гласови во вториот круг

Премиерот и лидер на ВМРО-ДПМНЕ, Христијан Мицкоски, очекува победа на кандидатот на неговата партија во вториот круг од локалните избори во Брвеница. Тој најави дека партијата ќе одржи завршно обраќање пред жителите на општината и посочи дека целта е да се надминат 4.000 освоени гласови. Мицкоски потсети дека во првиот круг ВМРО-ДПМНЕ освоило речиси 3.000 гласови и изрази очекување поддршката дополнително да порасне.

Мицкоски ги критикуваше политичките противници

Лидерот на ВМРО-ДПМНЕ оцени дека политичките партии кои се обединиле околу противкандидатот воделе кампања со етнички поделби, наместо да им се обраќаат на граѓаните преку конкретни проекти. Според него, по изборите жителите на Брвеница, без разлика на етничката и верската припадност, ќе продолжат заеднички да живеат. Тој порача дека изборот треба да се базира на резултатите и проектите, а не на политиките од минатото.

Очекува мирен изборен ден во недела

Мицкоски упати порака до жителите да размислат кому ќе му ја дадат довербата, посочувајќи дека едни имале повеќе од две децении можност да направат промени, додека актуелните власти, според него, реализираат проекти и подобрувања во квалитетот на животот. Тој очекува изборниот ден во недела да помине мирно, без поголеми инциденти, оценувајќи дека тоа би било потврда за демократската зрелост на земјата.