КРЕДИТИТЕ СО КАМАТА ОД 4,68%, ДЕПОЗИТИТЕ СО 2,19%: Народната банка ги објави податоците за септември

Просечната каматна стапка на вкупните кредити во септември изнесувала 4,68 проценти, додека кај депозитите достигнала 2,19 проценти, покажуваат најновите податоци на Народната банка. Во споредба со август, каматата на кредитите и депозитите бележи минимален раст од 0,01 процентен поен. Сепак, кај новоодобрените кредити е забележано позначително зголемување, додека каматите на новопримените депозити благо се намалиле на месечно ниво.

Раст на камата кај новите кредити

Просечната каматна стапка на новоодобрените кредити во септември изнесувала 4,94 проценти, што е раст од 0,24 процентни поени во однос на август и 0,47 процентни поени на годишно ниво. Кај новопримените депозити, пак, каматната стапка изнесувала 2,70 проценти, со месечно намалување од 0,02 процентни поени, но годишен раст од 0,47 процентни поени.

Колкави се каматите за домаќинствата и компаниите?

Кај домаќинствата, каматната стапка на вкупните кредити останала непроменета на пет проценти, додека кај новоодобрените кредити достигнала 4,77 проценти. Вкупните депозити на домаќинствата се орочувале со просечна камата од 2,12 проценти, а новопримените депозити со 2,69 проценти. Кај компаниите, просечната камата на вкупните кредити изнесувала 4,36 проценти, додека кај новоодобрените кредити достигнала 5,05 проценти, со месечен раст од 0,37 процентни поени. Податоците се од најновата информација на Народната банка за движењата на каматните стапки на банките и штедилниците за септември 2026 година.