СЕ РАЗГЛЕДУВА ДИРЕКТНА АВИОЛИНИЈА СКОПЈЕ–ДОХА: Муцунски на средби со „Катар ервејз“ во Катар

Министерот за надворешни работи и надворешна трговија, Тимчо Муцунски, денеска во рамки на официјалната посета на Катар остварил деловни средби со извршните директори на „Катар ервејз“ и „Барзан холдингс“.

На средбата со раководството на „Катар ервејз“, една од водечките светски авиокомпании, Муцунски ја претставил инвестициската отвореност на Владата, а се разговарало и за можностите за воспоставување директна авионска линија меѓу Скопје и Доха.

Доколку се реализира ваква авиолинија, таа би значела подобро поврзување на Македонија со Катар, но и полесен пристап до пошироката мрежа на летови преку Доха.

Во фокусот на посетата се и економската соработка, инвестициите и можностите за зајакнување на деловните врски меѓу двете земји.

Официјална одлука за авиолинијата засега нема, но темата е отворена како можност во разговорите со „Катар ервејз“.