ИЗБОРНИТЕ РЕАКЦИИ ПРОДОЛЖУВААТ: ВМРО-ДПМНЕ ја обвини ВРЕДИ за победата на ДУИ во Брвеница, тие возвратија дека гласовите не се ничија сопственост

Политичките реакции по локалните избори во Брвеница продолжуваат, откако ВМРО-ДПМНЕ упати обвинувања до коалицијата ВРЕДИ дека придонела за изборната победа на ДУИ во општината. Од ВРЕДИ ги отфрлија обвинувањата, порачувајќи дека ниту една политичка партија не е сопственик на гласовите на граѓаните.

Стојаноска: ВРЕДИ одигра во корист на ДУИ

Пратеничката Дафина Стојаноска од ВМРО-ДПМНЕ оцени дека ВРЕДИ во вториот круг од изборите за градоначалник на Брвеница застанала зад кандидатот на Националната алијанса за интеграција (НАИ), со што, според неа, придонела за победата на ДУИ. Таа посочи дека ВМРО-ДПМНЕ и коалицијата „Твоја Македонија“ во првиот круг го поддржале својот кандидат Стојанчо Радичевски, додека ВРЕДИ настапила со сопствен кандидат. Според Стојаноска, ВРЕДИ ја пропуштила можноста да покаже дека води различна политика од ДУИ.

ВРЕДИ: Гласовите им припаѓаат на граѓаните

Од ВРЕДИ ги отфрлија обвинувањата, нагласувајќи дека изборите се одржале во демократски процес и дека конечната одлука ја донеле граѓаните.

„Ниту една политичка партија не ги контролира гласовите, ниту пак некоја партија може да полага право на сопственост врз нив. Гласовите им припаѓаат на граѓаните, кои се слободни да одлучат кому сакаат да ја доверат својата поддршка“, порачаа од коалицијата.

Критики за етничките поделби

Од ВРЕДИ оценуваат дека изборите во Брвеница покажале оти земјата сè уште треба да работи на изградба на инклузивно и граѓански ориентирано општество. Воедно, упатија критики до СДСМ и Левица поради, како што велат, повиците за етнички засновано гласање, предупредувајќи дека таквата реторика придонесува за продлабочување на поделбите и поларизацијата во општеството.