(ВИДЕО) ПЛАТИТЕ ВО АРМИЈАТА СЕ ЗГОЛЕМУВААТ ЗА 10%: Историски раст со буџетот за 2027 година

Платите на сите вработени во Армијата и одбраната ќе се зголемат за 10 проценти, предвидува буџетот за 2027 година, кој помина на последната владина седница и сега влегува во собраниска процедура. Министерот за одбрана Владо Мисајловски најави дека зголемувањето ќе ги опфати не само основните плати, туку и сите нивни составни компоненти. Тој го оцени ова како историски исчекор и најголемо зголемување досега изразено во апсолутна вредност. Според Мисајловски, решението е постигнато преку социјален дијалог и соработка со синдикатите.

Зголемувањето ги опфаќа сите компоненти на платата во армијата

„Платите во Армијата и одбраната се зголемуваат за 10 проценти. Тоа значи историски најголемо зголемување во апсолутна вредност. Се зголемува основната плата, но и сите компоненти што се опфатени во платата“, изјави Мисајловски. Тој посочи дека подобрувањето на примањата и статусот на припадниците на Армијата било едно од неговите ветувања.

Мисајловски: Ова го остваривме преку социјален дијалог

Министерот им честиташе на вработените и нагласи дека зголемувањето е резултат на соработката со синдикатите и припадниците на Армијата. „Ние сме НАТО Армија и преку социјален дијалог ова го остваривме“, порача Мисајловски, додавајќи дека целта е Армијата да биде меѓу институциите со најдобри примања во државата.