ПОСТРОГИ УСЛОВИ ЗА КРЕДИТИ ОД 1 ДЕКЕМВРИ: Помали задолжувања и пократки рокови за отплата

Од 1 декември годинава граѓаните ќе се соочат со построги услови за задолжување, откако Народната банка воведува нови ограничувања за кредитната задолженост и роковите за отплата. Максималниот однос меѓу месечните кредитни обврски и приходите се намалува за пет процентни поени, додека промените кај роковите најмногу ќе ги почувствуваат оние што купуваат дополнителен стан или земаат хипотекарен потрошувачки кредит. Поповолни услови остануваат за граѓаните кои првпат го решаваат станбеното прашање.

Колку ќе може да се задолжуваат граѓаните?

Кај денарските кредити, максималниот однос на месечните кредитни обврски со приходите се намалува од 50 на 45 проценти, а кај кредитите со валутна компонента од 45 на 40 проценти. Тоа значи дека граѓанин со месечни приходи од 60.000 денари, наместо досегашните 30.000, ќе може да има најмногу 27.000 денари месечни кредитни обврски. Со новите правила, банките ќе имаат помал простор за одобрување кредити кај граѓаните кои веќе имаат поголема задолженост.

Пократки рокови за отплата на станбени и хипотекарни кредити

Станбените кредити за купување втор или дополнителен стан ќе може да се отплаќаат најмногу 25 години, наместо досегашните 30 години. Кај хипотекарните потрошувачки кредити, максималниот рок се скратува од 20 на 15 години. Исклучок се лицата кои првпат купуваат сопствено живеалиште – за нив останува рокот до 30 години и можноста за минимално сопствено учество од 10 проценти. Пократкиот рок за отплата значи повисоки месечни рати за ист износ на кредит, доколку каматните стапки и другите услови останат непроменети.