Тирана хит дестинација за есен: Три дена може да ве чинат околу 180 евра

Тирана меѓу најповолните во Европа

Тирана е прогласена за најповолна европска дестинација за есенско градско патување, според истражување на туристичката агенција „Thomas Cook“ во кое биле анализирани 51 популарна европска локација. Според податоците, просечниот дневен трошок во Тирана во септември изнесува околу 60 евра, што значи дека тридневен престој може да се организира за приближно 180 евра по лице. Просечното ноќевање на почетокот на септември чини околу 32 евра, додека за оброк се потребни околу 8 евра. Дополнително, цените за некои од туристичките атракции се движат околу 5 евра.

Букурешт и Анталија веднаш зад Тирана

На второто место на листата се најде Букурешт со просечен дневен буџет од околу 67 евра, а трет е турскиот град Анталија со околу 78 евра дневно. Во топ 10 се најдоа и Варшава, Истанбул, Мугла, Краков, Вилнус, Франкфурт и Лион. Истражувањето покажува дека во 18 од анализираните градови туристите можат да поминат еден ден со помалку од 117 евра. Балканските дестинации, според анализата, се издвојуваат со поволен сооднос меѓу трошоците и туристичката понуда, што ги прави привлечни за есенски патувања.