ЃОРЧЕСКА ЗАГУБИ ВО ЉУБЉАНА: Македонката елиминирана во првото коло

Романката Булгару славеше во три сета

Најдобрата македонска тенисерка Лина Ѓорческа доживеа пораз на стартот на ВТА 125 турнирот во Љубљана, Словенија. Ѓорческа беше поразена од романската тенисерка Мариам Булгару со 2:1 во сетови, односно 6:4, 1:6, 6:2, во меч кој траеше 135 минути. Романката го освои првиот сет со 6:4, откако направи брејк уште во првиот гем, што на крајот се покажа како доволно за предност. Во вториот сет Ѓорческа одигра одлично и поведе со убедливи 5:0, а потоа со 6:1 израмни на 1:1 во сетови. Во решавачкиот сет Булгару поведе со 3:0, но Ѓорческа успеа да намали на 3:2 и да внесе неизвесност во мечот. Сепак, романската тенисерка освои три гема во низа и го затвори мечот со 6:2. Турнирот во Љубљана се игра за награден фонд од 100.000 евра.

Следен предизвик за Ѓорческа во Анкара

Ѓорческа со ова го завршува настапот на турнирот во Љубљана, а следниот настап ќе го има наредната недела. Македонската тенисерка ќе настапи на турнирот во Анкара, каде ќе се обиде да се врати на победнички пат.