ОСУДЕН ШВАЈЦАРСКИОТ ФУДБАЛЕР ГРАНИТ ЏАКА

Швајцарскиот фудбалер Гранит Џака е осуден на условна парична казна од 150.000 швајцарски франци поради случај поврзан со фалсификувана потврда за ковид. Пресудата ја донело швајцарското обвинителство во Луцерн, а Џака јавно потврди дека ја прифаќа одлуката и ја презема одговорноста.

Казната нема да се активира доколку не го прекрши законот

Санкцијата е одредена преку 50 дневни износи од по 3.000 швајцарски франци, со условен рок од две години. Тоа значи дека Џака нема да ја плати оваа сума доколку во наредните две години не стори ново кривично дело, додека судските трошоци веќе ги подмирил.

Џака призна дека во 2022 година добил неправилна потврда

Аферата во јавноста излезе во септември, кога швајцарскиот весник „Блик“ објави дека против фудбалерот е отворена истрага. Неколку дена подоцна Џака призна дека во 2022 година добил неправилна потврда, наведувајќи дека во тој период имал стравови и сомнежи поврзани со имунизацијата. Фудбалерот порача дека целосно го прифаќа исходот од постапката и им се заблагодари на сите кои му испратиле пораки за поддршка.