ХОЛАНЃАНЕЦ ТРЧАЛ МАРАТОН ДОДЕКА БИЛ НА БОЛЕДУВАЊЕ: работодавачот сега мора да му плати 60.000 евра

Холандски работник кој учествувал на маратон додека бил на боледување добил судска пресуда во своја корист, со која работодавачот е обврзан да му исплати околу 60.000 евра. Случајот привлече внимание поради прашањето дали физичката активност за време на боледување автоматски значи дека работникот е способен да се врати на работа.

Судот утврдил дека отказот бил незаконски

Работникот бил вработен во холандската туристичка агенција „Prijsvrij“ и во декември 2024 година заминал на боледување поради сериозни проблеми со видот. Подоцнежните медицински прегледи укажале дека најверојатно боледува од мијастенија гравис, хронична болест што предизвикува мускулна слабост. Тој однапред ги информирал лекарите дека продолжува да трча, а лекарите процениле дека сè уште не е способен да се врати на работното место.

Работодавачот ангажирал приватни детективи

Откако дознала дека работникот учествувал на маратонот во Ротердам во април 2025 година, компанијата го отпуштила со образложение дека ја нарушил довербата. Судот, сепак, оценил дека отказот бил неоправдан и дека следењето на работникот и неговото семејство претставувало непропорционален упад во приватноста. Апелациониот суд во Хаг ја потврдил одлуката, со која на работникот му се досудени 50.000 евра отштета, над 10.000 евра други надоместоци, како и дополнителни трошоци и исплати.