ЕУ ПРЕДУПРЕДУВА ЗА ПАМЕТНИТЕ ОЧИЛА: Можат да ве снимаат без ваше знаење

Европскиот одбор за заштита на податоците (EDPB) предупредува на ризиците за приватноста што ги носат паметните очила со вградени камери и микрофони, кои можат да снимаат луѓе без нивно знаење. Во соопштението усвоено оваа недела се наведуваат прелиминарни насоки за корисниците, производителите и давателите на услуги. Одборот нагласува дека луѓето треба јасно да бидат известени кога се снимаат, вклучително и на јавни места. Како можни решенија се посочуваат видливи светлосни сигнали, звучни предупредувања и известувања на паметните телефони. Посебен ризик постои во болниците, училиштата и работните места, како и кога снимките се објавуваат на социјалните мрежи. Децата се издвоени како особено ранлива категорија, без разлика дали ги користат уредите или се предмет на снимање. Од EDPB посочуваат дека производителите и давателите на услуги имаат одговорност да обезбедат обработката на личните податоци да биде во согласност со правилата за приватност

Снимањето мора да биде јасно забележливо

Претседателката на EDPB, Ана Талус, порача дека граѓаните заслужуваат јасни предупредувања, а не непријатни изненадувања кога станува збор за нивната приватност. Според насоките, сигналите дека очилата снимаат треба да бидат сигурни и лесно забележливи, за луѓето во близина да знаат дека може да бидат снимани.

Децата и чувствителните места се под посебен ризик

Извештајот нарачан од Европскиот одбор за заштита на податоците укажува дека паметните очила може да се користат и за следење други лица или за собирање материјали против нив, без тие да бидат свесни за тоа. Дополнителни ризици се јавуваат кога снимките се споделуваат на интернет, особено ако прикажуваат деца или се направени во чувствителни средини. Целта на препораките е да се подигне свеста за тоа кога се користат ваквите уреди и како се обработуваат собраните податоци.