АВМУ со реакција за „Арена“: Ги отфрла тврдењата за незаконско постапување

АВМУ тврди дека постапува согласно законот

Агенцијата за аудио и аудиовизуелни медиумски услуги (АВМУ) ги отфрла како неточни и неосновани наводите на Македонската медиумска асоцијација и Македонската радио-телевизија за третманот на програмските сервиси Arena M1, Arena M2 и Arena M3 Premium. Од АВМУ велат дека постапуваат исклучиво во рамките на своите законски надлежности и врз основа на доставена документација и информации добиени од домашни и странски надлежни субјекти.

„Се третираат како странски програмски сервиси“

Според АВМУ, овие програмски сервиси се третираат како странски програмски сервиси кои се реемитуваат во земјава, а не како домашни телевизиски сервиси. Причината, како што наведуваат, е тоа што нивниот изворен сигнал не се емитува на територијата на Северна Македонија. Агенцијата ги отфрла и инсинуациите дека со своето постапување овозможува заобиколување на законските обврски. Од АВМУ ги повикуваат ММА и МРТ, доколку располагаат со докази за незаконско постапување, да ги достават до надлежните институции.