ДРАМА НА БЛАЦЕ: Со автомобил влечел цариник и побегнал, уапсен е во Скопје

Косовскиот државјанин Р.Е. (24) е уапсен во Скопје откако претходно побегнал од граничниот премин Блаце и со автомобил влечел царински службеник неколку метри. Инцидентот се случил додека цариникот вршел контрола на неговото возило „бмв“ со косовски регистарски ознаки. Осомничениот ненадејно го стартувал автомобилот, го турнал службеникот и продолжил да се движи кон Скопје.

Полицијата го запрела на Јадранска магистрала

Полициски службеници од Единицата за интервентна полиција веднаш почнале потрага по возилото. Косовскиот државјанин бил лоциран и лишен од слобода околу 22 часот на улицата „Јадранска магистрала“ во Скопје. Возилото било запрено, а осомничениот бил спроведен во полициска станица.

Пронајдени марихуана и џебен нож

При прегледот на теренот полицијата пронашла кеса со марихуана, додека во автомобилот бил најден џебен нож. Приведениот изјавил дека за време на бегството фрлил и кеса во која имало два пиштола. Полицијата продолжува со расчистување и документирање на случајот, по што против него ќе биде поднесена соодветна пријава.