(ВИДЕО) СИЉАНОВСКА-ДАВКОВА: Македонија треба да биде една изборна единица, секој глас мора да има иста тежина

Претседателката Гордана Сиљановска-Давкова смета дека Македонија треба да има една изборна единица, бидејќи на тој начин секој глас би имал еднаква вредност, без оглед на тоа во кој дел од државата е даден. Таа оцени дека ваквиот изборен модел, иако поретко се применува во светот, би бил добро и праведно решение за земјава.

Различен број гласови носи победа во различни единици

Во интервју за телевизијата „Канал 5“, претседателката посочи дека во сегашниот модел кандидатите победуваат со различен број гласови во различните изборни единици. Според неа, токму затоа е потребно да се обезбеди еднаква тежина на гласот на секој граѓанин.

Сиљановска-Давкова се осврна и на гласањето на македонските државјани кои живеат во странство. Таа смета дека избирачкото право произлегува од државјанството и не треба да биде ограничено поради местото на живеење.

Гласање по пошта или електронски за иселениците

Претседателката посочи дека голем број држави им овозможуваат на иселениците да гласаат по пошта или преку електронски системи. Според неа, ваквите решенија би можеле да се разгледаат и во Македонија, имајќи ги предвид ограничените можности за гласање во дипломатско-конзуларните претставништва.

Таа нагласи дека измените на Изборниот законик треба да бидат донесени со широк политички и општествен консензус. Во однос на техничката влада, оцени дека досегашниот модел е премногу партизиран и дека треба да се применат европски практики кои ќе овозможат фер и непристрасен изборен процес.