ФИФА ОТПУШТИ ДИРЕКТОР: го критикувал Инфантино поради контроверзниот план

Ламур јавно го обвини раководството за недостиг на транспарентност

ФИФА го отпушти главниот оперативен директор Кевин Ламур, откако тој јавно го критикуваше претседателот Џани Инфантино и неговиот план поврзан со продажба на удел во Светското првенство. Ламур во јули изјави дека вработените во организацијата биле доведени во заблуда поради недостигот на транспарентност околу планот и порача дека „заслужуваат повеќе од презир и заплашување“. ФИФА потврди дека работниот однос со Ламур завршил на 17 август, но не ги коментираше условите за неговото заминување. Тој во организацијата пристигна во ноември 2024 година и беше еден од повисоките функционери во нејзиното раководство.

Беше дел од тимот што го донесе Инфантино на чело на ФИФА

Ламур беше близок соработник на Инфантино и ја предводеше неговата кампања при изненадувачката победа на претседателските избори во ФИФА во 2016 година. Неговото отпуштање доаѓа во период на сериозни несогласувања околу планот на Инфантино да продаде удел во Светското првенство на фондови за приватен капитал. Предлогот, вреден околу 20 милијарди долари, наиде на жестоко противење, по што Инфантино го повлече. УЕФА, Азиската фудбалска конфедерација и КОНКАКАФ побараа преиспитување на постапките на претседателот на ФИФА, додека Ламур претходно порача дека доколку неговата критика значи губење на работата, тој е подготвен да ја прифати одлуката.