Ѓорѓиевски: Скопје го гради својот најголем еколошки штит

Изградбата на пречистителната станица за отпадни води во Скопје се одвива со забрзана динамика, а досега се реализирани речиси 40 проценти од градежните работи. Станува збор за еден од најзначајните инфраструктурни и еколошки проекти во земјава, кој треба трајно да го намали загадувањето на реката Вардар.

Проектот опфаќа околу 60 објекти

Пречистителната станица е најавена како најголемиот и најсовремен еколошки проект во Македонија и опфаќа изградба на околу 60 објекти. Со нејзиното ставање во функција, отпадните води ќе се третираат пред да бидат испуштени во Вардар.

Од Град Скопје информираат дека проектот претходно се соочил со застој поради незавршени административни постапки, неусвоени детални урбанистички планови, нерешена експропријација и задоцнети исплати кон изведувачот. Според нив, овие проблеми се надминати и работите сега се одвиваат според предвидената динамика.

Завршувањето се очекува во 2028 година

Градоначалникот на Град Скопје, Орце Ѓорѓиевски, оцени дека пречистителната станица е проект од историско значење за главниот град. Тој истакна дека со нејзината изградба треба да се стави крај на долгогодишното загадување на Вардар со непречистени отпадни води и да се создаде поздрава животна средина.

Според договорот меѓу ЈП „Водовод и канализација“ – Скопје и изведувачот, градежните активности треба да завршат во првата половина на 2028 година. Потоа е предвиден двегодишен период на пробна работа, кој треба да заврши во првата половина на 2030 година.