ЗАСИЛЕНИ КОНТРОЛИ НА ОХРИДСКОТО ЕЗЕРО: Ќе се задржуваат глисери, чамци и скутери со нерегулиран царински статус

Царинската управа започнува засилени контроли на глисерите, чамците, скутерите и другите пловни објекти на Охридското Езеро. Целта е да се спречат злоупотребите со пловила внесени во земјава преку постапката за привремен увоз, а чиј царински статус не бил навремено регулиран.

Ќе се проверува царинскиот статус на пловилата

Контролите ќе бидат насочени кон проверка дали сопствениците ги исполниле своите законски обврски и дали пловилата се користат во согласност со царинските прописи. Злоупотребите најчесто се поврзуваат со пловила привремено увезени од странски државјани, кои остануваат во земјава по истекот на дозволениот рок, се препродаваат или трајно се оставаат без спроведена царинска постапка.

Ќе се контролира и дали со пловилата управуваат исклучиво лица што имаат законско право да ги користат. Пловилата на нерезиденти по истекот на дозволата за привремен увоз треба да го напуштат царинското подрачје или за нив да биде спроведена редовна царинска постапка.

Можно е привремено задржување на пловилата

Сите пловни објекти затекнати со нерегулиран царински статус ќе бидат предмет на законска постапка. Царинската управа ќе ги утврдува неплатените обврски, а пловилата може привремено да бидат задржани сè додека сопствениците целосно не ги исполнат обврските.

Од Охридската капетанија можат да ги откријат и да ги пријават сопствениците на спорните пловила, но немаат овластување самостојно да изрекуваат царински казни. Поради тоа, контролите ќе се спроведуваат во координација со Царинската управа, која апелира сопствениците навреме да го регулираат статусот за да избегнат задржување на пловилата.