Македонија
Дознај прв
ХАЏИ ВАСИЛЕВА ГО ПОБЕДИ ПЕЛИВАНОВ: Разлика од само седум гласа на изборите за шеф на ОЈО ГОКК
Искра Хаџи Василева победи на изборите за шефица на ОЈО ГОКК со 64 гласа, седум повеќе од Трајче Пеливанов.
Изборот за нов шеф на Основното јавно обвинителство за гонење организиран криминал и корупција заврши со тесен резултат, откако Хаџи Василева го победи Пеливанов со разлика од само седум гласа.
Искра Хаџи Василева освоила 64 гласа, додека Трајче Пеливанов добил 57, покажуваат официјалните резултати од изборот. На гласањето учествувале 175 од вкупно 187 јавни обвинители со право на глас, а четири ливчиња биле неважечки.
Хаџи Василева ќе го наследи Ислам Абази
Со победата, Хаџи Василева е избрана за нова шефица на Основното јавно обвинителство за гонење организиран криминал и корупција, на местото на Ислам Абази, чиј мандат истекува. Таа има 11-годишно обвинителско искуство, а од октомври 2024 година работи во ОЈО ГОКК.
Петмина кандидати во трката
За раководната функција се натпреваруваа петмина обвинители. По Хаџи Василева и Пеливанов, Јован Цветановски освоил 30 гласа, Фатон Азизи 14, а Лидија Раичевиќ шест гласа.
