ИЗВАДЕТЕ СИ КЕШ ЗА ВИКЕНДОВ: Сите банки најавија можни привремени прекини на дел од услугите

Граѓаните и компаниите во Македонија треба навреме да ги планираат плаќањата следниве денови, бидејќи во текот на претстојниот викенд е можно привремено да бидат недостапни дел од банкарските услуги. Сите банки во земјава ќе спроведуваат планирани технички прилагодувања на своите системи поради воведувањето нови стандарди во денарскиот платен промет. Новите правила започнуваат да се применуваат од понеделник, 9 ноември. Промените се однесуваат на начинот на пополнување и обработка на платните налози, новите шифри за целта на плаќањето и користењето на платежните сметки во ИБАН-формат. Од Македонската банкарска асоцијација информираат дека точните термини на евентуалните прекини и услугите што ќе бидат засегнати ќе ги објави секоја банка поединечно. Граѓаните се повикуваат да ги следат известувањата од своите банки и навреме да ги реализираат плаќањата. Од Асоцијацијата појаснуваат дека постојните броеви на платежните сметки остануваат непроменети, а банките ќе го приспособат нивниот приказ и користење во ИБАН-формат. Така што, извадете си кеш за викендов, можни се прекини на банкарските услуги.