МИЦКОСКИ КОН ФИЛИПЧЕ – во 2022 сме биле 8 по инфлацијата меѓу 12 држави во регионот, а сега трети

Премиерот Христијан Мицкоски на собраниска седница одговори на пратеничко прашање од лидерот на СДСМ, Венко Филипче, при што направи споредба на економските показатели во периодите на двете влади. Според податоците што ги презентираше, инфлацијата во јуни 2026 година изнесувала 3,4 отсто, додека во истиот месец во 2022 година била 14,7 отсто. Мицкоски посочи дека во 2022 година Македонија била осма по висина на инфлацијата меѓу 12 држави во регионот, додека сега ја дели третата позиција со Албанија.

Унгарскиот заем и инфраструктурните проекти

Осврнувајќи се на унгарскиот заем, Мицкоски рече дека половина од средствата биле употребени за отплата на еврообврзница вредна 500 милиони евра. Дел од преостанатите средства, според него, биле пласирани како субвенционирани кредити за компаниите со каматна стапка од 1,95 отсто. Остатокот бил насочен кон инфраструктурни проекти во општините, вклучително и во оние каде што градоначалници се од редовите на СДСМ. Премиерот додаде дека цените на горивата во Македонија се меѓу најниските во регионот.

Споредба на платите и пензиите

Мицкоски наведе дека од јули 2017 до мај 2024 година просечната нето-плата месечно растела за околу 224 денари, додека од јули 2024 до мај 2026 година просечниот месечен раст изнесувал 373 денари. Тој посочи и дека за речиси две години просечната пензија се зголемила за повеќе од 7.000 денари. Според премиерот, економскиот раст во последните две години бил поголем од растот постигнат во шестгодишниот период на претходната власт. Мицкоски порача дека презентираните бројки ја покажуваат разликата меѓу двете влади.