МИТЕВА: Македонија има највисок економски раст во регионот

Македонија остварила највисок економски раст меѓу шесте економии на Западен Балкан во вториот квартал од 2026 година, изјави владината портпаролка Марија Митева, повикувајќи се на најновите извештаи на Светската банка и Европската комисија. Според извештајот на Светската банка, објавен на 27 октомври, прогнозата за економскиот раст на земјава за 2026 година е зголемена на 3,2 проценти, односно за 0,3 процентни поени во однос на претходните проекции.

Митева – Растот во вториот квартал достигна 4,3 проценти

Според податоците на Европската комисија, македонската економија во вториот квартал бележи раст од 4,3 проценти, наспроти 3,1 процент во првиот квартал. Просечниот раст во регионот изнесува 3,6 проценти, што ја позиционира Македонија пред соседните економии во овој период.

Градежништвото со раст од 21,9 проценти

Податоците на Државниот завод за статистика покажуваат дека градежништвото во вториот квартал остварило реален раст од 21,9 проценти, преработувачката индустрија пораснала за 4,1 процент, а секторот информации и комуникации за 4,3 проценти. Истовремено, финалната потрошувачка е зголемена номинално за седум проценти, а бруто-инвестициите бележат номинален раст. Митева оцени дека овие показатели укажуваат на зголемена економска активност во повеќе сектори, нагласувајќи ја улогата на капиталните инвестиции, инфраструктурните проекти и градежништвото во економскиот развој.