НА ФИЛИПИНИТЕ ЌЕ СЕ ГРАДИ СТАТУА НА ИСУС ВИСОКА 207 МЕТРИ

Полска инженерска компанија подготви проект за изградба на статуа на Исус Христос висока 207 метри на Филипините, која, доколку биде реализирана, би можела да стане највисокиот споменик од овој вид во светот. Монументот е планиран во провинцијата Илокос Сур, во северниот дел на земјата, а зад концептуалното решение стои компанијата „Слипформ“ од полскиот град Шчеќин. Проектот сè уште е во фаза на разгледување и треба да добие одобрение од филипинскиот инвеститор и надлежните институции. Компанијата ја претстави и визуелизацијата на идниот споменик, кој би ги надминал постојните монументални статуи на Исус Христос.

Носечката конструкција би се градела за околу 40 дена

Од полската компанија посочуваат дека планираат да применат технологија со лизгачки кофражи, која овозможува континуирано изведување високи бетонски конструкции. Според директорот Даниел Кисала, носечкото армирано-бетонско јадро, високо повеќе од 200 метри, би можело да биде изградено за околу 40 дена. Сепак, овој рок се однесува на главната носечка конструкција, а не на завршувањето на целиот монумент.

Проектот на статуата на Исус сè уште чека одобрение

Идејното решение е доставено до филипинскиот инвеститор, а следниот чекор би бил подготовка на деталната техничка документација доколку проектот биде одобрен. Засега не е избран конечниот изведувач на сите градежни работи, ниту е потврден датум за почеток на изградбата. Ако биде реализирана во планираните димензии, статуата висока 207 метри би ја надминала и Статуата на единството во Индија, која е висока 182 метри.