НОВ СПОР МЕЃУ ШПАНИЈА И ИТАЛИЈА: Мадрид бара веднаш да се укинат граничните контроли

Италија воведе дополнителни проверки по кризата во Сеута

Шпанија побара од Италија веднаш да ги укине селективните гранични контроли за патниците кои пристигнуваат од шпанска територија по воздушен и поморски пат. Дополнителните проверки беа воведени по големата мигрантска криза во шпанската енклава Сеута. Шпанскиот министер за внатрешни работи Фернандо Гранде-Марласка на вонредна видеоконференција на министрите од Европската Унија оцени дека мерката е непотребна. Тој нагласи дека влегувањето во Сеута не значи автоматски и пристап до Шенген-зоната.

Европската комисија ќе ја оценува италијанската одлука

Еврокомесарот за внатрешни работи Магнус Брунер најави дека Европската комисија ќе провери дали привремената суспензија на шенгенските правила кон Шпанија била пропорционална. Италијанскиот министер за надворешни работи Антонио Тајани, пак, изјави дека контролите не се насочени против Шпанија. Според него, станува збор за превентивна мерка чија цел е заштита на националната безбедност и интегритетот на европскиот систем за гранична контрола. Новиот спор меѓу Мадрид и Рим следува по масовниот обид на мигранти да влезат во Сеута.